• Abe Rábade: dirección, composición e piano
• Perico Sambeat: saxofón alto e soprano
• Pablo Martín Caminero: contrabaixo
• Naíma Acuña: batería
• Cibrán Seixo: violín e efectos
• Jimena Andión: violonchelo
• Davide Salvado: voz e percusión tradicional
• Antía Muíño: voz e percusión tradicional
• Miguel Pardo de Castro: danza tradicional

O exercicio profesional de Abe Rábade ocupa un lugar selleiro no presente panorama jazz europeo. Pianista, compositor e improvisador, o seu traballo sempre se desenvolveu nun ámbito no que a creación artística vai máis alá dos límites do estritamente musical para se transformar nunha sorte de observación, reflexión e diálogo con todo o que existe. As súas pezas combinan a precisión arquitectónica do compoñer, a liberdade do improvisar e unha constante atención ás fibras invisibles que vencellan memoria, paisaxe, identidade e experiencia.

Durante máis de dúas décadas, Rábade foi construíndo un corpo de obra caracterizado pola coherencia estética e intelectual, alleo a modas e etiquetas. A súa música, situada na confluencia da de cámara, do jazz, da tradicional galega e da composición contemporánea, non busca resolve-las tensións entre estas linguaxes, senón habitar de xeito fecundo o espazo que as separa. Alí onde as fronteiras se esvaecen, aparece unha voz sen comparanza que entende a cultura como lugar de encontro e a escoita como unha forma de coñecemento.

Nova Botánica, a última de Abe, dispón nunha trenza a música de tradición galega, a _jazz _e maila de cámara. A vexetación autóctona de Galicia representa o fío condutor da obra para os efectos de contrastar sensibilidades musicais; de dialogar con textos populares e con autores pertencentes a diferentes culturas e épocas nun bosque mixto que pon de acordo o urbano e mailo rural, a experimentación e a ortodoxia, o transcendente e o desenfadado.