• Iker García: guitarra
• Ángel Cáceres: baixo
• Pablo Levin: batería

O power trío madrileño vén de lanza-lo seu segundo disco, Progresa Adecuadamante; máis contundente, máis Gilipo se posible. Sobe de nota e parece non ter límites. Uns rapaces de barrio que pasaron as tardes desde a tenra adolescencia tocando en grupos ás mancheas e colaborando con numerosos compañeiros de profesión, madía leva!, son quen de achegarse a tódolos públicos. Ao se tratar de melómanos realmente apaixonados, os membros desta banda permiten sen complexos que nas súas composicións se mostre a influencia de infinidade de artistas: Frank Zappa, System of a Down, Tower of Power, Screaming Headless Torsos, Magma e Cardiacs fan exemplo. Cocíñannos jazz punk, cun oitenta e sete coma vinte e nove por cento de música instrumental —porcentaxe de panadeiro—, combinado con outros estilos e xéneros, sexan funk, rock progresivo, metal, sexan trazos de música clásica. Engaden o humor que desperdician en directos e videoclips. Poden recordar, no que a posta en escena se refire, a Les Luthiers e a Tricicle. Saboroso todo!