• Jazzmeia Horn: voz
• Santiago Vásquez Viñas: piano
• Ameen Saleem: baixo
• Enrico Morello: batería

Á marxe e máis alá de notas biográficas e desenvolvementos curriculares, o que hoxe se amosa certeza é o feito de Jazzmeia Horn (Dallas, Texas, 1991) saber en pouco tempo e malia a súa xuventude atrae-la atención de crítica e público. A dimensión do seu rexistro vocal e semellante dominio técnico trouxeron de inmediato á mente de moitos o recordo de Ella Fitzgerald, sobre todo pola práctica do scat. Mesmo así, as súas fontes foron outras… No principio estivo o canto, o gospel da igrexa, os espirituais… Neles xermolou a orixe de todo o dito, a orixe do seu propio nome. Pois Jazzmeia é o seu nome real, o que lle puxo a súa avoa paterna ao nacer, o que fala da súa auténtica esencia: «A miña avoa, que estaba casada cun pastor eclesiástico e tocaba o piano e o órgano na igrexa, decidiu o meu nome, Jazzmeia […]. Ela quería ser músico profesional, pero como estaba casada cun ministro da igrexa non podía interpretar música laica como jazz ou blues profesionalmente. Esa foi a razón pola que ao nacer me puxo o nome. De algún modo, continuou o seu legado».

Vencedora no 2015 da Thelonious Monk Institute of Jazz International Vocals Competition e no 2013 da Sarah Vaughan International Jazz Vocal Competition, a súa reputación de artista emerxente, rising star, non tardou en acadar Nova York. Desexosa de inicia-la súa carreira como solista trasladouse alí no 2009 para graduarse na New School for Jazz and Contemporary Music e axiña comezou a actuar como sidewoman con destacados músicos: Winard Harper, Junior Mance, Billy Harper, alumnos do Lincoln Center, Vincent Gardner, Delfeayo Marsalis, Mike LeDonne, Peter Bernstein, Johnny O’Neal, Vincent Herring, Kirk Lightsey, Frank Wess e Ellis Marsalis. Sen tardar, aparece en importantes festivais internacionais de jazz e míticos clubs: The Apollo, The Blue Note, Dizzy’s Jazz Club Coca-Cola, Minton’s, The Jazz Standard, Smalls Jazz Club, Jazz Gallery, Birdland e The New Jersey Performing Arts Center.